「廿一由八」四字看似沒有特別意思,但只要細心觀察,就不難發現「廿一由八」豎看是一個「黃」字,而「廿一由八」的兩位創辦人Thomas和Vera就正正姓黃,可見兩位老闆心思細膩。這家木製家俬工房位於火炭工厦,由兩位80後年輕人創立,創立原因,全為「追夢」二字。

廿一由八的創辦人Thomas
廿一由八另外一位創辦人Vera(左)

創辦人之一的Thomas,本來在香港從事廣告行業多年,但因不甘每日應酬sell橋的沈悶而忙碌的生活,在接觸graphic後就深深愛上,因而毅然到英國留學進修。「我之前就做廣告嘅,咁就覺得好悶,成日飲飲食食,咁我就唔鍾意啦。之後我就轉行做graphic。 Graphic其實同廣告差好遠,係兩個範疇黎,一個(廣告)就要好對外成日開會傾計傾橋,但做graphic 呢就係關於點樣同觀眾溝通多啲。」這一個決定,就埋下了日後創立「廿一由八」的伏線。

不要以為製造木工的辦公室會好混亂,其實也是很整潔。
木凳的接口位

但在英國進修的日子並不易過,Thomas坦言留英第一年就花光了所有錢,之後更因沒錢而只有住在店鋪裡。「我第一年就用哂所有錢,唯有一路搵freelance做,一路半工讀,咁所以點解要住到咁慘,就係想慳返啲錢。我果時日日都踩單車,一個鐘一程,落雨都照踩,咁跟住就日日食麵包。」生活清貧卻無阻他追求夢想和興趣,Thomas反而更好好享受外國生活,到處遊歷探索,更表示在英國接觸到全新的世界,對日後設計的靈感都頗有助益:「喺英國話就話讀書啦,但就好鬆嘅,一個月可能交一張海報架姐。所以就日日踩單車去周圍睇個世界,感受下外國氣氛。」

牆上的掛畫是由Thomas以前所設計。
木的元素離不開草,將兩者互相襯托會更為配合大自然。

在英國進修後,Thomas便和Vera回到香港創業,自行設計實木家具,實踐心中夢想。Thomas表示,他的第一筆創業基金,是透過在英國一位華人客人向他訂造了8件家具而得。憑著10萬的本金,他就租下了火炭這個工厦單位,創立了「廿一由八」。不過由於租金昂貴,很多事情都只好靠Thomas和Vera親自去做,整個工作室的一桌一椅,都是二人的心血。「當時黎到呢到係吉嘅,咁就惟有同個friend自己油牆身自己舖地啦。呢啲燈係我自己拖條線黎自己拉嘅,有時仲會電親。咁當時有個客就知我地返左黎,就問可唔可以訂造傢俬,第一張單就係一張飯檯一張長凳同一個櫃,4萬幾蚊,果陣時就即刻做左果啲傢俬,一路做一路裝修。上一年啲錢係一攞到就即刻放返落去,投資左一年。」

Thomas和Vera對待客人訂單更是萬二分認真。Thomas表示,每次客人下訂單時,都會和客人聊得很仔細,確保了解客人的特別需要,再需要打造出理想的家具。「有次有個客,屋企有小朋友,咁佢就想屋企啲嘢全部都係圓邊,咁我就幫佢做返個要求。」Thomas又表示,每次訂單都會有些許不同,因為都是按客人要求和實際情況量身訂造,務求讓客人滿意。其敬業之精神,在香港或許已是碩果僅存。

因為安全問題,很多工具都雖要整齊放好。

Thomas和Vera事必躬親,雖然面對重重難關,但仍然堅持追夢,認真看待每一件家具,實在值得更多的支持和鼓勵。Thomas透露,他們即將重新裝修工作室,希望舉辦一個木傢俱製作展,希望讓更多香港人對木製家具的工序有更多認識,若然對木製家具有興趣,不妨多留意「廿一由八」的資訊,給予本港這些追夢的年輕人支持!


23/09/2018 01:15:20 +08:00