不少讀者也許平日也會逛家俬店，看見合心意的梳化椅子可能會試坐一下，但往往都不免覺得「齋坐」有點尷尬，無法真正體驗家品。香港本土家具品牌OUT OF STOCK深明顧客的需要，將位於火炭的店鋪打造成一家咖啡店，配以真正的家具配置，讓顧客彷如置身家中，在一片輕鬆和諧的氣氛中體驗店中家具。

OUT OF STOCK明明是一家傢俬店，何以會配上咖啡廳的佈置？原來這與他們的創辦理念有關。「公司理念就同個slogan有關，就係『good to be home』,叫做『回家真好』。可能外邊都會好common聽過呢句說話，但其實我地好想營造一個感覺係屋企嘅感覺。啫係喺呢度你見到嘅所有嘢，即使係你飲緊嘅咖啡，你都可以買返屋企，我地好想create 到呢個體驗，等客人將自己鍾意嘅嘢都可以帶返去。」

他們續：「平時IKEA啲傢俬任你坐，但係你就得個坐字。咁我地就想俾你有個機會體驗，可以飲下咖啡咁。即使我地嘅櫈係幾萬蚊，但我地都想你試下先。因為你就咁坐5-10分鐘其實feel唔到梳化係咪真係舒服，咁你透過同朋友坐下食下嘢，坐一個下晝，覺得啱手形喇舒服喇，咁先去買。我地都想輕鬆咁令客人唔會覺得坐咁耐唔好意思。」OUT OF STOCK明白客人需要，將看似冷冰冰的家俬店變成溫暖的家，體貼又細心。

除了咖啡廳佈置之外，有沒有發覺「OUT OF STOCK」這個店名很有趣古怪？問及原因時，他們這樣回答：「OUT OF STOCK呢個字，咁跟返字面解釋，就啫係冇貨咁解呀嘛，咁好似好唔吉利，但其實對於我地做生意嚟講其實係好事嚟架。冇貨啫係賣哂啦，咪啫係好生意。不過其實我地最初嘅解釋其實係希望我地嘅creativity可以源源不絕。因為我地都係讀design，idea對我地好重要，所以希望啲idea可以不停咁出現。」一家店鋪，要是能配上一個有趣的名字，便能產生畫龍點睛之效。而OUT OF STOCK正正就完美演繹了這點。

而OUT OF STOCK在產品方面服務也非常認真。「我地每個project開始之前都會問返客人嘅需要同喜好，要了解哂佢地嘅生活習慣，然後先開始design嘅。因為我地係設計間屋俾你真係喺到住架嘛，唔係整個示範單位出嚟，咁所以所有嘢要迎合到你嘅生活習慣，例如你需要好多storage space嘅，咁你間屋再細我都要諗方法幫你整收納室間，所以我地會從個客人嘅生活方法同需要去幫佢design。」這種以客為本的執著，相信客人定會有賓至如歸的感覺。

除了提供室內設計服務，其實OUT OF STOCK更提供一條龍服務，連同家具也能一併包攬。「如果有個客人想做室內設計，佢鍾意呢啲style，咁我地幫佢做之餘，fit in嘅傢俬就係我地嘅賣嘅傢俬。因為你出去搵人幫你做嘅時候，個designer幫你諗，但其實佢係要幫你出去搵傢俬架嘛，咁但係既然我地嘅客人係鍾意我地嘅傢俬，咁我地就可以直情幫佢fit in埋。」當然所售賣的家具也相當高質，不少是從日本空運到港，喜歡日本家具的讀者萬勿錯過。

OUT OF STOCK這種致力為客人帶來「家的感覺」的店鋪在香港不多，他們表示希望能將這概念帶給更多的人，讓更多人認識他們。OUT OF STOCK新開張的火炭旗艦店提供6000呎的寬闊空間，讓客人一場來到可以瞭解更多。不妨到火炭的OUT OF STOCK喝杯咖啡，享受一個悠閒的下午吧！

Page: OUT OF STOCK